Scol Saludabel

Scol Saludabel na Aruba

Na  November di aña 2011 pa medio di un Decreto Ministerial (MB) a instala e grupo encarga cu e Plan Strategico pa Scol Saludabel na Aruba.

Esaki a encera: skirbi un plan di maneho cu lo delinea e pasonan cu mester sigui pa yega na un Scol Saludabel cu ta pas pa Aruba. A uza diferente ehempel y strategia di tanto Latino America, Europa y Merca.

A traha un plan concreto cu a keda aproba pa e dos ministernan concerni,Minister di Educacion y Minister di Salubridad, y pa Conseho di Minister.

E siguiente paso tawata pa traha un plan di implementacion.  A instala , pa medio di un MB nobo, un grupo di implementacion cu ta consisti di 2 representante di Departamento di Enseñansa Aruba (DEA), 4 diDepartamento di Salud Publico, 1 di Departamento di Asuntonan Social y 1 di Instituto Pedagogico Arubano (IPA).

A  scoge 5 scol piloto pa cana e proceso di implementacion, cu ta Mon Plaisir Basis, Mon Plaisir Kleuter, Scol Primario Kudawecha, Scol Primario Cacique Macuarima, Scol Primario St Paulus.

A scoge e scolnan a base di criterianan manera  ubicacion (diferente districto), tin un docente di Movecion y Salud, comision di Mayor activo etc.

Kico ta un Scol Saludabel?

Un Scol Saludabel ta un scol cu di un manera structural y duradero ta traha riba mehoracion di salud di e mucha y di e maestro pa asina mehora su prestacion y calidad di bida. Esaki no ta un proyecto, pero ta bira parti di e maneho di scol. Cada scol ta determina individualmente su prioridadnan y ta traha su Plan di Salud di acuerdo cu su prioridadnan.